பீர்க்கங்காய் தேங்காய்ப்பால் கறி & வறை

கோடை வெய்யிலுக்கு உடலிலிருந்து வெளியேறும் வியர்வைக்கு ஈடு செய்ய நீர்த் தன்மையுடைய உணவுகளை உண்ணவேண்டும். உடலுக்கு குளிர்ச்சியுடன் வெப்பத்தால் வரண்ட நாவுக்கு சுவையையும் கொடுக்கக் கூடியது இது.

புடலங்காய், பாவற்காய், சுரைக்காய், கொடியினத்தைச் சேர்ந்த காய்களுள் பீர்க்கங்காயும் ஒன்று.
நாங்கள் இங்கு பிசுக்கங்காய் என யாழ்ப்பாணத்தில் அழைப்போம்.
சிங்களத்தில் வட்டகொலு என அழைப்பார்கள்.

கருக்குப் பிசுக்கு பால்பிசுக்கு என இருவகையில் கிடைக்கும்.

கருக்கு பிசுக்கானது கரும் பச்சை நிறமானது. தோலின் மேற்பரப்பில் உச்சி வரப்புகள் பத்துவரை நீளவாக்காக இருக்கும். 10முதல் 30 செமி வரை நீளமாகும். இவை பனங்கருக்குப் போல அல்லது அரிவாள் நுனி போல கூர்மையாகவும் அத்துடன் வரிவரியாகவும் இருக்கும். இவை நுனியில் ஒடுங்கி வந்து இணைவது போலிருக்கும். அதனால்தான் Ribbed gourd, Ridged gourd என்பார்கள். Angular எனவும் அழைப்பதுண்டு.

பொட்டனிக்கல் பெயர் Luffa acutangula. கொடியினத்தைச் சார்ந்த Cucurbitaceae இனத்தைச் சேர்ந்தது. அழகிய மஞ்சள் பூக்களுடன் இருக்கும்.

பால்பிசுக்கு மெல்லிய பச்சை நிறமாக இருக்கும். இது கருக்குப் பிசுக்கு போல சொரசொரப்பு இல்லாமல் வழுவழுப்பாக இருக்கும். தோலையும் உட்பகுதியையும் வௌ;வேறு விதமாகச் சமையல் செய்யலாம். தேங்காய்ப் பால்கறி, காரக்கறி, கூட்டு, சாம்பார், பருப்பு மசியல், பால் சொதி, சட்னி, பச்சடி, துவையல், தொக்கு, பொரியல் போன்று பலவாக செய்து கொள்ள முடியும்.

கொழ கொழவென நீராளமாக இருப்பதால் சிலருக்குச் சாப்பிடப் பிடிப்பதில்லை.

மாமிசம் சாப்பிடுபவர்கள் கருவாடு, இறால், அவித்த முட்டை சேர்த்துச் சமைத்துக் கொண்டால் சுவை அதிகரிக்கும்.

சமைத்த கறியும் காணாமல் போய்விடும்.

போஸாக்கு 100 கிராமில்

கலோரி 17
புரதம் 0.5
கொழுப்பு 0.1
கல்சியம் 18 மிகி
இரும்பு 0.5 மிகி
கரோட்டின் 12,
விற்றமின் சி 5
பொட்டாசியம் 50மிகி

பொதுவாக சத்துக்கள் நிறைந்த காய் அல்ல.

நீர்ச் சத்தும் நார்ப்பொருளுமே குறிப்பிடத்தக்க அளவு உண்டு.

கொழுப்பும் கலோரிச் சத்தும் குறைவாக இருப்பதால் கொலஸ்டரோல், நீரிழிவு நோயாளருக்கு சிறந்தது. எடை அதிகரிப்பை விரும்பாதவர்களுக்கும் ஏற்றது.

வெயில் காலத்தில் ஏற்படும் உடற் சூடு, சிறுநீர்க்கடுப்பு, இரண்டையும் நீக்கும் தன்மையுள்ளதாகக் கூறுகிறார்கள்.

வெப்பத்திற்கு தோன்றும் வாய்ப்பருக்களைத் தடுக்கும் என்பர்.

கிராமங்களில் காயவைத்து எடுத்த இதன் உள்நார்ப் பகுதியை உடலில் தேய்த்துக் குளிப்பதற்குப் பயன்படு;துவார்கள்.

அலங்காரப் பொருட்கள் செய்வதற்கும் பயன்படுகிறது.

எண்ணெய் சேர்க்காத தேங்காய்ப் பால்கறி நோயாளர்களுக்கு மிகவும் ஏற்றது. பத்தியக்கறியாக அமையும்.

பீர்க்கங்காய் கொழகொழப்பாக இருப்பதால் கிழங்கு சேர்த்தால் சுவை தரும். கறியும் தடிப்பாக இருக்கும். அதனால் உருளைக் கிழங்கு சேர்த்துக் கொள்ளலாம்.

குப்பைத் தொட்டியல் வீசும் தோலை வைத்தே ஒரு வறை செய்து கொள்ளலாம்.

தோலில் நிரம்பிய சத்துக்கள் இருப்பது நமக்குத் தெரிந்ததுதானே.

தேங்காய்ப் பால்க் கறி

தேவையான பொருட்கள்.

பீர்க்கங்காய் - 1
உருளைக்கிழங்கு -1
சின்ன வெங்காயம் - 10 அல்லது பெரியவெங்காயம் - 1
பச்சை மிளகாய் - 2
கறிவேற்பிலை- 2 இலைகள்.
ரம்பை இலை – 1 துண்டு
தேங்காய் கட்டிப்பால்- 2 மேசைக்கரண்டி
உப்பு – தேவைக்கு ஏற்ப
தேசிச்சாறு – 1 தேக்கரண்டி
மஞ்சள் தூள் - (விரும்பினால்) சிறிதளவு.


செய்முறை –

காயிலுள்ள உயர்ந்த கருக்குகளை சீவி எறிந்து விடுங்கள்.

மேல் தோலை சற்று ஆழமாக சிறிது சதையுடன் சீவி எடுங்கள்(வறை செய்வதற்கு).

உட்பகுதியை எடுத்து துண்டங்களாக வெட்டி வையுங்கள்.

உருளைக்கிழங்கை சிறிய துண்டங்களாக வெட்டி சிறிது நீர் விட்டு உப்புப் போட்டு அவிய விடுங்கள்.

முக்கால் பாகம் வெந்ததும் பீர்க்கங்காய் துண்டுகள்,பச்சை மிளகாய் சேர்த்து இரண்டு நிமிடம் அவியவிடுங்கள்.

அவிந்ததும் வெட்டிவைத்த வெங்காயம், ரம்பை, கறிவேற்பிலை, தேங்காய்பால் விட்டு சிறிது உப்பு சேர்த்து ஓரு கொதிவர இறக்கிவிடுங்கள்.

எலுமிச்சம் சாறுவிட்டு பிரட்டி எடுத்து வையுங்கள். தேங்காய் பால் வாசத்துடன் எலுமிச்சை வாசமும் சேர்ந்து மணம் கமழும்.

( சாதம், இடியப்பத்துக்கு பிசைந்து சாப்பிட சுவையாக இருக்கும். )

வறை (பொரியல்)

தேவையான பொருட்கள்.

வெட்டி வைத்த மேல்தோற் பகுதி.
செத்தல் மிளகாய் - 1
வெங்காயம் - ¼
தேங்காய் துருவல் - 4 மேசைக்கரண்டி.
மிளகாய் பொடி – ¼ தேக்கரண்டி.
சீரகப் பொடி - ¼ தேக்கரண்டி.
பூண்டு விழுது – சிறிதளவு
உப்பு – தேவைக்கு ஏற்ப
எண்ணைய் - 2 தேக்கரண்டி
கடுகு – சிறிதளவு
உழுத்தம்பருப்பு – சிறிதளவு
கறிவேற்பிலை – சிறிதளவு

செய்முறை –

தோலைக் கழுவி மிகவும் மெல்லிய குறுனல்களாக (பொடியாக) வெட்டிவையுங்கள்.

செத்தல்,வெங்காயம் வெட்டி எடுத்துக்கொள்ளுங்கள்.

எண்ணையில் கடுகு, உழுத்தம் பருப்பு, செத்தல் தாளித்து, வெங்காயம், பூண்டு, கறிவேற்பிலை சேர்த்துக் கிளறுங்கள்.

பொடியாக வெட்டிய காயை கொட்டி உப்பு,மிளகாய் பொடி ,சீரகப்பொடி போட்டுக்கிளறி விடுங்கள்.

அவிவதற்கு சிறிது நீர் தெளித்து அவியவிடுங்கள்.

அவிந்தபின் (கரண்டியால் காயை அமர்த்திப்பார்த்தால் காய் அவிந்தது தெரியும்) தேங்காய் துருவல் கலந்து ஒருநிமிடம் வறுத்து எடுத்து வையுங்கள்.

வறையின் வாசத்தில் பக்கத்து வீட்டுக்காரர்களுக்குப் பசி வந்துவிடும்.

( காரம் விரும்பாதவர்கள், சிறுவர்களுக்கு மிளகாய் பொடிக்குப் பதில் மஞ்சள் பொடி சேர்த்து வறை செய்யலாம் )

மாதேவி

அம்பரல்லா மசாலாக் குழம்பு

மாங்காய், நெல்லி, ஆப்பிள், அன்னாசி, இவற்றின் சுவையுடன் சேர்ந்த இனிய புளிப்புச் சுவையுடைய காய் இது. மாம்பழமும் அன்னாசியும் கலந்தது போன்ற வித்தியாசமான சுவையுடையது.

வீட்டுத் தாவரமாகவும்

40 அடி உயரம் வரை வளரக் கூடியது. நல்ல மழை வீழ்ச்சியும் குளிர்மையும் உள்ள சூழலில் நன்கு வளரும்.

ஆயினும் வீட்டுத் தாவரமாக வளரக் கூடிய குள்ள இனங்கள் உண்டு. மாடிவீட்டு பல்கனிகளில் பெரிய பீப்பா தகரங்கள் அல்லது பெரிய பிளாஸ்டிக் பாத்திரங்களில் வளர்க்கலாம்.


சிறிய தாவரமாக இருக்கும்போதே காய்க்கத் தொடங்கும். 2-4 வருடத்தில் அதிக காய்களைத் தரக் கூடியது. பச்சை நிறக் காயாக இருக்கும் இது பழுக்கும் போது மெல்லிய மஞ்சள் நிறமாக மாற்றமடையும்.


தென்னாசிய நாட்டுக்கான தாவர இனமாகக் கொள்ளப்படுகிறது. ஆசியாவிற்கு வெளியிலும் சில இடங்களில் அபூர்வமாகக் காணும் இனம் இது.

இதன் தாவரப் பெயர் Spondias dulcis ஆகும். ஆயினும் ஆங்கிலத்தில் Golden Apple, Wi-Tree, Otaheite Apple என்றெல்லாம் அழைப்பார்கள்.
பச்சையாகவும்

பச்சையாகவே உண்ணக் கூடியது. ஆயினும் பச்சை நிறக் காய் புளிக்கும். கடிக்கும் போது நொறு நொறுக்கும்.

பதப்படுத்தியும்

இக் காயில் ஊறுகாய், அச்சாறு, சட்னி செய்து கொள்ளலாம். பதப்படுத்தப்பட்டு போத்தல்களில் அடைக்கப்பட்டு சட்னிகள் பாவனையில் உள்ளன.

பானமாகவும்

தோல் நீக்கி துண்டங்களாக வெட்டி எடுத்து தண்ணீர் விட்டு அடித்தெடுத்து வடித்து உப்பு அல்லது சீனி சேர்த்து பானமாக பருகிக் கொள்ளலாம்.

போசாக்கு

விட்டமின் சீ, உடையது, அயன் கூடியளவு உண்டு. முக்கியமாக நார்ப்பொருள் அதிகமாக உள்ளது. எனவே மலச்சிக்கல் உள்ளவர்களுக்கு நல்லது.

அம்பிரலா மசாலாக் குழம்பு

தேவையான பொருட்கள்


அம்பிரலா காய் - 5
பெரிய வெங்காயம் - 1
செத்தல் மிளகாய் - 2
கடுகு – ¼ ரீ ஸ்பூன்
கருவேற்பிலை, ரம்பை சிறிதளவு
மிளகாய்ப் பொடி – 1 ரீ ஸ்பூன்
தனியாப் பொடி - 2 ரீ ஸ்பூன்
சீரகப் பொடி -1 ரீ ஸ்பூன்
மஞ்சள் பொடி – ¼ ரீ ஸ்பூன்
மசாலாப் பொடி சிறிதளவு
கெட்டித் தேங்காய்ப் பால் - 2 டேபிள் ஸ்பூன்
வெல்லம் - 1 கட்டி
ஒயில் - 2 ரீ ஸ்பூன்

செய்முறை

அம்பிரலாவைக் கழுவி தோலுடன் நாற்புறமும் துண்டங்களாக வெட்டியெடுங்கள்.
விரும்பினால் விதையுடன் கூடிய உட்பகுதியையும் சேர்த்துச் சமைத்துக் கொள்ளலாம்.

வெல்லத்தை காய்ச்சி வடித்து எடுத்து வைத்துக் கொள்ளுங்கள்.

வெங்காயம் செத்தலை சிறு துண்டுகளாக வெட்டி எடுங்கள்.

ஓயிலில் கடுகு தாளித்து வெங்காயம் செத்தல் வதக்குங்கள். கருவேற்பிலை ரம்பை சேர்த்து கிளறுங்கள்.

அரைக் கப் தண்ணீர் விட்டு உப்புப் போட்டு காயைக் கொட்டி 2 நிமிடம் அவித்து எடுங்கள்.

மிளகாய்ப் பொடி, தனியாப் பொடி, மஞ்சள் பொடி, மசாலப் பொடி, சேர்த்துக் கிளறுங்கள்.

கட்டித் தேங்காய்ப் பால் விட்டு, வடித்து எடுத்து வைத்த வெல்லத்தையும் சேர்த்துக் கிளறி இறக்கி வையுங்கள்.

மிகவும் இலகுவாக 5 நிமிடத்தில் புளிப்பு சுவையான அம்பிரலா மசாலாக் குழம்பு தயாராகிவிடும்.

உண்ண உண்ண

பிரியாணி, சாதம், புட்டுக்கு இனிப்புப் புளிப்பு சுவையுடன் சுவை சேர்க்கும்.

விதையுடன் இருக்கும் சதைப் பகுதி கடித்துச் சாப்பிடுவதற்குச் சுவை கொடுக்கும்.

அவசரத்தில் தும்புடன் கடித்து பல்லிடுக்கில் சிக்க விடாதீர்கள். மீன் சாப்பிட்ட பழக்கம் கைகொடுக்கும் அல்லவா? தும்புகள் வாயில் குத்தவும் வாய்ப்பிருக்கிறது.

மாதேவி

ஈரப்பலா ஸ்பெசல் கறி, சிப்ஸ்

செவ்வாய் காலை பரபரப்பாகவே விடிந்தது.

காலை உணவு முடித்து விரைந்தேன் வெள்ளவத்தை மார்க்கட்.

கண்கள் சுற்றி வந்தது எதை வாங்கலாம், எப்படிச் சமைக்கலாம்?

கத்தரி, பாவல், வெண்டி, புடொல், முள்ளங்கி...எனப் பரவியிருந்தது.

அதை அடுத்து ....

இன்றைக்கு சந்தைக்கு வந்துவிட்டதே!
மனம் துள்ளியது.

தம்பி ரிஷான் கேட்டிருந்த பொருள் அல்லவா?

விற்றுக்கொண்டிருந்த
'மல்லி'யை நோக்கி

'தெல் கீயத ?'

'திகாய் அக்கே கண்ட'


இன்று என்ன இவ்வளவு மலிவாகச் சொல்கிறான்.

கிடைத்தது மிச்சம்.

பையனிடம் மீண்டும் வாய் கொடுக்காமல், வந்த சிரிப்பையும் அடக்கி
வாயைக் கடித்தபடி நல்ல காயாகப் பார்த்துப் பொறுக்கினேன்.

'யாழ்ப்பாணத்துச் சனங்களுக்கெண்டால்' சாதாரண விலையிலும் 10-20 ருபா கூட விற்பார்கள்.

காசை கொடுத்துவிட்டு காயை வாங்கிக் கொண்டேன்.

அட சற்று அவன் பார்வை சரி.....இல்லை.

அட பயப்படாதீர்கள் என்னை நோக்கியல்ல!

தான் தந்த பலாக்காய் போட்ட ரிசுப் பையின் மேல்தான்! அவன் ஏக்கப் பெரு மூச்சு விடாத குறை.

யாழ்தேவிப் வாசகர்களுக்கு என்று தெரிந்துவிட்டால்......விலையும் மூன்று மடங்காகிவிடும்.

புகை வண்டிபோல் கூவிச் சத்தமிடாது, கடுகதியில் அடுத்த கடையை நோக்கிப் பாய்ந்தேன்.

இப்படி சமைத்தகாய் இருமடங்காகச் சுவைக்கும்தானே.

வெப்பவலயப் பிரதேசங்களில் இது வளரும். மலாய்தீவு, மேற்குப் பசுபிக் தாயகமாகக் கொண்ட மரம்.

இலங்கையின் தென்பகுதிகளில் கூடுதலாகப் பயிரிடப்பட்டிருக்கும்.
ஏனைய பிரதேசங்களிலும் பரவலாகவுள்ளது.

பயன்கொடுக்கும் காலத்தில் ஒரே மரம் இருநூறுக்கும் மேற்பட்ட காய்களைத் தரக் கூடியது.

காபோஹைதரேற் கூடியளவு உள்ளது. விற்றமின் சி யும் உண்டு.

முற்றிய பலாக்காயை தேர்ந்தெடுப்பது ஒரு கலை.
அனுபவம் கை கூடவேண்டும்.

வெளித்தோல் விரிந்த கட்டங்களாக இருப்பதைத் தேர்ந்தெடுப்பேன்.

விரலால் சுண்டிப் பார்த்தால் காயிலிருந்து 'டங்' என சத்தம் தெறிக்கும்.

தெறித்தது.

அப்படி எடுத்த காயில், சமைத்த கறியின் ருசியைச் சுவைத்துப் பார்க்க வாங்களேன்.

ஈரப்பலாக்காய்க் கறி


தேவையான பொருட்கள்

நன்கு முற்றிய ஈரப்பலாக்காய் -1
வெங்காயம் -1
பச்சை மிளகாய் -1
தேங்காய்ப் பால் - ¼ கப்
பூண்டு- 4 பல்லு
இஞ்சி – 1 துண்டு
மிளகுப்பொடி- ¼ ரீ ஸ்பூன்
மிளகாய்ப்பொடி -1 ரீ ஸ்பூன்
மல்லிப்பொடி – 1 ரீ ஸ்பூன்
உப்பு – தேவைக்கேற்ப
புளிப்பேஸ்ட் அல்லது எலுமிச்சம்சாறு - தேவைக்கேற்ப
கடுகு- சிறிதளவு
கறிவேற்பிலை- சிறிதளவு
ஒயில் - 1 ரீ ஸ்பூன்

செய்முறை


பலாக்காயை பெரிய நீள் துண்டுகளாக வெட்டியெடுங்கள்.

உள்ளிருக்கும் சக்கையுடன் கூடிய நடுத் தண்டின் பாகங்களையும், வெளித்தோலையும் சீவி நீக்கி விடுங்கள்.

தண்ணீர்விட்டு அவித்து எடுத்துக்கொள்ளுங்கள்.

ஆறியதும் 2அங்குல அகலத் துண்டுகளாக வெட்டி வையுங்கள்.

வெங்காயம் மிளகாய் வெட்டி எடுங்கள்.

ஒயிலில் கடுகு தாளித்து வெங்காயம் மிளகாய் வதக்குங்கள்.

வதங்கிய பின் நசுக்கிய இஞ்சி,பூண்டு வதக்கி கறிவேற்பிலை சேர்த்துவிடுங்கள்.
தேங்காய்ப்பால் ஊற்றி பலாக்காய், மிளகாய்ப் பொடி, மல்லிப்பொடி, உப்பு, புளிப்பேஸ்ட் சேர்த்து கொதிக்க விடுங்கள்.

நன்கு கொதித்து வர கிளறி இறுகிவர, மிளகுப் பொடி தூவி இறக்குங்கள்.

மிளகு வாசத்துடன் தாளித்த மணமும் பரவி நிறையும்.

பலாக்காய் சிப்ஸ்


பலாக்காயை மிகவும் மெல்லிய 2' நீள் துண்டுகளாக வெட்டி எடுங்கள்.

அடுப்பை மிதமாக வைத்து ஒயிலில் அவற்றைப் போட்டு கவனமாக அடிக்கடி கிளறுங்கள்.

பொரிந்து நன்கு கலகலப்பாக வந்ததும் எடுத்து எண்ணையை வடியவிடுங்கள்.

மிளகாய் பொடி, உப்பு பொடி சேர்த்துப் பிரட்டுங்கள்.

ஆறியதும் கண்ணாடிப் போத்தலில் காற்று நுளையாதபடி அடைத்து வையுங்கள்.

நல்ல மொறுமொறுப்பாய் இருக்கும்.

இரண்டுகால் எலிகள் தின்னாது விட்டால் 2-3 நாட்களுக்கு கெடாது இருக்கும்.

(பொரித்த பின் மிளகாய் பொடி, உப்பு பொடி என்பவற்றை குழந்தைகள் பெரியவர்களுக்கு ஏற்ப வகை வகையான காரத்தில் சேர்க்கலாம்)

மாதேவி

வாழைக்காய்க் காரப்பிரட்டல்

'கிச்சு கிச்சு தாம்பாளம்
கீயா மாயா தாம்பாளம்...'

மற்றொன்று

'.... தாராம்பட்டி வாழைக்காய்
பூவும் பிஞ்சும் மண்டபத்தில்
பூமாதேவி கையை எடு.'

பாலர்களாக இருந்த காலத்தில் விளையாடிய விளையாட்டுக்களில் இப்படியும் சில இருந்தன.

சிறுவர்கள் வட்டமாகச் சுற்றி இருந்து இரு கைகளையும் நிலத்தில் வைத்திருக்க, ஒருவர் பாடிக்கொண்டே எண்ணி வருவார். பாட்டு எவருடைய கையில் வந்து முடிகிறதோ அவர் அக் கையை எடுக்க வேண்டும். இவ்வாறு தொடரும்.

இறுதியில் எவர் கையில் பாட்டு முடிவுறாது இருக்கிறதோ அவர் வெற்றி பெற்றவராகக் கொள்ளப்படுவார்.

அப்பொழுது பாடலும் விளையாட்டும்தான் நினைவு.

இப்பொழுது நினைவெல்லாம் தாராம்பட்டி மேல்தான். அங்குள்ள வாழைக்காய்கள் நிறையச் சுவை தருமா?

வாழை

தென் கிழக்கு ஆசியாவில்தான் முதன் முதலில் வாழை பயிரப்பட்டிருந்தது. வெப்ப வலயப் பிரதேசங்களில் பெரும்பாலும் பயிரப்படும். எந்த நிலத்திலும் பயிரிடப்படக் கூடியது. நீர்வடி நிலமாக இருப்பின் சிறந்தது.

வாழை மரங்களின் முதல் எதிரி காற்றுத்தான். காற்றுக் காலத்தில் பெருமளவு மரங்கள் குலையுடன் முறிந்து போய்விடுகின்றன.


'வெண் மேகம் கறுத்து
வெளியெல்லாம் குளிர் பரவி
ஊரடங்கிக்
காரிருள் சூழ
கொட்டும்
அடை மழையில்
குலை சாய்ந்து
அழுகிப் போவேனே.

பேய் (காற்று) வீசுவதால்
குலை நடுக்கம் ஆனேனே
அந்தோ!
காலனும் வந்துவிட்டானா'

என என் வீட்டு வாழை பாடியது கேட்கிறதா?

சாம்பல் வாழைக்காய், மொந்தன் வாழைக்காய் என இரு இனங்கள் எமது பகுதிகளில் உண்டு.

போசணை அதிகம் உண்டு

இதில் காபோஹைரேட் பெரும்பாலும் உண்டு.

இத்துடன் இரும்புச் சத்தும் உள்ளது. ஒரு கப் (200 கிறாமில்) நிரம்பிய கொழுப்பு 1சத விகிதம் தான் உண்டு.
விட்டமின் சீ, நார்ப்பொருள், பொட்டாசியம்
ஆகியனவும் உண்டு என்பதால்
பிரஸர், மற்றும் கொலஸ்டரோல் நோயாளிகளுக்கும் ஏற்றது.

நோயாளிகளுக்கும், குழந்தைகளுக்கும் கூட உகந்தது

பிஞ்சு வாழைக்காயை எடுத்து பால் கறியாகவும், சரக்குத் தண்ணியாகவும், சம்பலாகவும் பத்திய உணவாக நோயாளிகளுக்கும், குழந்தைகட்கும் கொடுப்பர்.

வாயுத் தொல்லை தராமல் இருக்க பெருங்காயம், பூண்டு, சீரகம், மிளகு சேர்த்து சமைத்துக் கொள்ளுவர்.

வாழைக்காய்க் காரப்பிரட்டல்


முற்றிய சாம்பல் வாழைக்காய் -2

குழம்பு தயாரிக்க

தக்காளிப் பழம் - 4
வெங்காயம் -2
பச்சை மிளகாய்- 1
பூண்டு – 4 பல்லு
வெந்தயம் - ½ ரீ ஸ்பூன்
கடுகு - ¼ ரீ ஸ்பூன்
மிளகாய்ப் பொடி – 2 ரீ ஸ்பூன்
தனியாப் பொடி – 1 ரீ ஸ்பூன்
மஞ்சள் பொடி - ¼ ரீ ஸ்பூன்
வறுத்து அரைத்த சோம்பு, கறுவாப் பொடி - ¼ ரீ ஸ்பூன்
புளிக் கரைசல்- தேவைக்கு ஏற்ப
உப்பு - தேவைக்கு ஏற்ப
கறிவேற்பிலை, மல்லித்தழை-சிறிதளவு.

பொரிக்க

எண்ணெய் - 4 டேபிள் ஸ்பூன்.

செய்முறை-

வாழைக்காயைத் தோல் சீவி, தண்ணீரில் முழுதாகப் போட்டுவிடுங்கள்.

வெங்காயம், தக்காளி, பச்சை மிளகாய் தனித்தனியே வெட்டி வையுங்கள்.
பூண்டை பேஸ்ட் ஆக்கி வையுங்கள்.

வாழைக்காயை எடுத்து நீளவாக்கில் இரண்டாகக் கீறி எடுங்கள். அரை அங்குல அகல துண்டுகளாக வெட்டி வையுங்கள்.

தாச்சியில் எண்ணெயை விட்டு கொதிக்க, வாழைக்காயைப் போட்டு பென்னிறமாகப் பொரித்து எடுங்கள்.

ஒரு டேபிள் ஸ்பூன் ஓயிலில் கடுகு கறிவேற்பிலை தாளித்து, பூண்டு சேர்த்துக் கிளறிக் கொள்ளுங்கள். வெங்காயம் போட்டு வதக்குங்கள்.

வதங்கிய பின் பச்சை மிளகாய், வெந்தயம் சேர்த்து, தக்காளி போட்டுக் கிளறுங்கள்.

தக்காளி வெந்த பின் மிளகாய்ப் பொடி, மஞ்சள் பொடி, தனியாப் பொடி, உப்பு, புளித் தண்ணீர் விட்டு பொரித்த வாழைக்காயைக் கொட்டி கொதிக்க விடுங்கள்.

கொதித்து இறுக்கமாக வர கறுவாப் பொடிதூவி கிளறி,மல்லித் தழை போட்டு இறக்குங்கள்.

சாதம், அப்பம், புட்டு, சப்பாத்தி, பிரட், தோசைக்கு தொட்டுக் கொண்டு சாப்பிட சுவை கொடுக்கும்.

(தேங்காய்ப் பால் சேர்க்க விரும்பினால் இறக்குமுன் கட்டிப்பால் சிறிதளவு விட்டு இறக்குங்கள்.)

மாதேவி

பலாச் சுளைக் கறி

கனிகளின் அரசியாம், முக்கனிகளில் ஒன்று, தித்திக்கும் தேன் சுவை ஊட்டும். பழங்களில் பெரிய பழம், தோலோடு உண்ண முடியாதது அது என்ன?

ஆகா! உங்களுக்குப் புரிந்திருக்கும்! கனி பலாப்பழம். பழமாக இனிக்க இனிக்க உண்ணலாம்.


பிஞ்சாக சமைக்கலாம் (பொலஸ் கறி),
முற்றிய ஆனால் கனியாத சுளைகளும் சுவையான கறியாகும்.
இலங்கையின் தென் பகுதி மக்களின் விருப்புக்குரிய உணவுதான் இந்த வரக்கா கறி.

முல்லைத்தீவுப் பலாப்பழம்

வட பகுதி மக்கள் பெரும்பாலும் கனிந்த பழத்தை மிகவும் விரும்பி உண்பார்கள். முல்லைத்தீவுப் பலாப்பழம் மிகவும் பிரசித்தமானது. முற்றிய காய்ப் பதமாக எடுத்து அங்கு சமையல் செய்வது குறைவு. இங்கு விளைந்து வரும் கனிகள் சுவையிலும் தரத்திலும் சிறந்ததாக இருக்கும். காரணம் இது வரண்ட பூமிப் பழமாகும். நீர்ப்பற்றுக் குறைவு. அதனால் இனிப்பு அதிகம்.


அதில் இருவகைப் பழங்கள் உண்டு. மஞ்சள் நிறமுடையது ஒன்று, மற்றையது இளம் சிவப்பு ஓரென்ஜ் நிறத்தில் செண்பகவரியன் என்ற பெயருடன் மிகவும் இனிப்பானது.

குஞ்சு குருமனாய் மரத்தின் அடியிலிருந்தே உச்சிவரை சென்று காய்த்துத் தொங்கும். வீட்டுத் தோட்டங்களில் பெரும்பாலும் நாட்டியிருப்பர்.


மரம்

இலங்கையில் பரவலாக எங்கும் வளரும் பலா மரம் சுமார் 25 அடி வரை உயர்ந்து வளரக் கூடியது. 3 வயதாகும் பொழுது காய்க்கத் தொடங்கும். பெரிய பலாக்காயின் நிறை 40 கிலோ வரை இருக்கும் என்கிறார்கள்.

மலை நாட்டில் கொக்கோ, கோப்பி, மிளகுச் செடிகள் இடையே பலா பயிரிடப்பட்டு இருக்கும்.
பழத்திற்காகவும் நிழலுக்காகவும் பயன்படுவதுடன் இதன் பலகை மரத் தளபாடங்கள் செய்யவும் பயன்படும்.
இலங்கை, இந்தியா, மலேசியா, மியன்மார், சீனா, பிலிப்பைன்சில் பெரும்பாலும் காணப்படும்.

இளம் காய்.

சமைப்பதற்கு மட்டுமின்றி, ஊறுகாயாகப் பதப்படுத்தி வைக்கவும் முடியும்.

முற்றிய காய்

முற்றிய காய்ப் பதத்தில் வெட்டி சுளைகளாக உரித்தெடுத்து, விதை நீக்கி வெட்டியெடுத்து குழம்பாகவும்,
பால் கறியாகவும்,
விதையுடன் கொத்தியெடுத்து பொரியலாகவும்,
அவித்தெடுத்து சிற்றுண்டியாகவும் சமைத்துக் கொள்ளுவர்.
பருப்பு மசியல்,கூட்டு,சுண்டல்,புட்டு, கூழ், செய்து கொள்ளலாம்.

விதை

பலாக் கொட்டையை உப்பிட்டு அவித்தெடுத்தும் உண்பர். பொரியல், கட்லற், வடை, அவியல், குருமா, பால் கறியாகவும், காரப் பிரட்டலாகவும் செய்து கொள்ளலாம்.

பலாக்கொட்டை சிப்ஸ் என்றால் பிள்ளைகள் பல்லு நொறு நொறுக்கக் காலியாக்குவர்.

பழம்


பழத்தில் தோசை, அடை, சிற்றுண்டி, சாதம், பொங்கல், பாயாசம், டெஸட், புருட் சலட் செய்து கொள்ளலாம்.

போஷாக்கு

இதில் விட்டமின் சீ, மாச்சத்து, சுண்ணாம்புச் சத்து அதிகம் உண்டு.

பொட்டாசியம் சத்து அதிகமுள்ளதால் பிரஸரைக் குறைக்கும் என்கிறார்கள்.

நிரம்பிய கொழுப்பு குறைவாக உள்ளதால் கொரஸ்டரோலை அதிகரிக்காது.

தாய்ப் பாலை அதிகம் சுரக்க வைக்கும் என்ற நம்பிக்கையால் பாலூட்டும் தாய்மார் அதிகம் உட்கொள்வதுண்டு.

இலை

இலைகள் ஆடு, மாடு போன்ற மிருங்களுக்கு நல்ல உணவாகும். அதன் காய்ந்த இலைகளை பசளையாகவும் பயன்படுத்துவர்.

தேவையான பொருட்கள்.


முற்றிய பலாக்காய் சுளைகள் - 10-15
வெங்காயம் - 1
பச்சைமிளகாய் -1
மிளகாய் பொடி – ½ ரீஸ்பூன்
தனியாப்பொடி -1 ரீ ஸ்பூன்
மஞ்சள் பொடி – சிறிதளவு
உப்பு – தேவைக்கேற்ப
பூண்டு - 4 பல்லு
மிளகு – ¼ ரீ ஸ்பூன்
கட்டித் தேங்காய்பால் - 2 மேசைக் கரண்டி
தண்ணித் தேங்காய்பால் - ¼ கப்
தேசிச் சாறு - ½ ரீ ஸ்பூன்

தாளிக்கத் தேவையானவை.

எண்ணைய் -2 ரீஸ்பூன்
கடுகு - 1/4 ரீஸ்பூன்
வெங்காயம் - ½
காய்ந்த மிளகாய் -1
கறிவேற்பிலை -2 இலைகள்
ரம்பை -2 துண்டு

செய்முறை

பலாக்காய் சுளைகளை நீளவாட்டில் பாதியாகக் கீறி விதையை எடுத்துவிட்டு நாலு நீள் துண்டுகளாக வெட்டி வையுங்கள். விதைகளின் தோலை நீக்கிவிட்டு குறுக்கே பாதியாக வெட்டுங்கள். இவற்றைத் தண்ணீர் விட்டு அலசி எடுங்கள்.

வெங்காயம் மிளகாயை நீளவாட்டில் ஓர் அங்குலத் துண்டுகளாக வெட்டி வைத்துக் கொள்ளுங்கள்.

பாத்திரத்தில் அனைத்தையும் போட்டு தண்ணீர்ப் பால் ¼ கப் விட்டு உப்பு, மிளகாய்ப் பொடி, தனியாப் பொடி, மஞ்சள் பொடி போட்டுக் கலக்கி மூடி போட்டு 2 நிமிடம் அவித்து எடுங்கள்.

திறந்து பிரட்டுங்கள்.

கெட்டிப் பால் விட்டு இறுகி வர, தட்டிய பூண்டு, மிளகு சேர்த்துப் பிரட்டி ஒரு நிமிடம் விட்டு இறக்குங்கள்.

தேசிச் சாறு கலந்து பிரட்டி விடுங்கள்.

தாளித்து கலந்துவிடுங்கள்.

மிளகு பூண்டு தாளித்த வாசம் மூக்கைக் கிளறி பசி எடுக்கும். உடனேயே சாப்பிட தட்டுத் தயாராக எடுத்துவிடுவீர்கள்.

மாதேவி

பயத்தங்காய் பலாக் கொட்டைப் பிரட்டல்

இந்துக்களின் முக்கிய விரத நாட்களில் இக் கறியும் சமைக்கப்படும். திவசம், அமாவாசை, பௌர்ணமி போன்ற பிதுருக்கு படைக்க வேண்டிய படையலில் நிச்சயமாக இக் கறியும் இடம் பெறுவது வழக்கம்.

பீன்ஸ் இனத்தைச் சேர்ந்த இது புரொட்டின் சத்தும் கூடியது. விரத நாட்களில் மட்டுமின்றி வீடுகளில் சாதாரண நாட்களிலும் இது சமையலில் இடம் பிடிக்கும்.

நீண்ட முற்றல் இல்லாத ஊர்ப் பயிற்றங்காயாக இருப்பது சுவையைக் கூட்டும்.


இக்காயுடன் வாழைக்காய் அல்லது உருளைக் கிழங்கு சேர்த்து குழம்பு செய்வதுண்டு.

இத்துடன் தேங்காய்ப்பால் வெள்ளைக்கறியும் சமைக்கலாம்.

பொரியல், கூட்டு செய்வதும் வழக்கம்.

முற்றிய விதைகளைப் பொரித்தெடுத்து சிப்ஸ்சும் செய்து கொள்வார்கள். காய்ந்த விதைகளை அவித்தெடுத்து சுண்டலாக உண்ணுவதும் வழக்கம்.

பொதுவாக முதலில் எண்ணெய் விட்டு, கடுகு வெங்காயம் தாளித்த பின் காயையும் போட்டு நன்கு வதக்கிய பின்பு தேங்காய்ப்பால், உப்பு, மிளகாய்ப் பொடி போட்டு சமைப்பார்கள்.

இன்றைய முறையில் காயை வதக்காமல் நேரடியாகச் சமைத்த பின்பு தாளித்து சேர்ப்பதால் காய் நன்றாக அவிந்து மென்மையாக இருக்கும்.

கறியும் நல்ல வாசத்துடன் இருக்கும்.

செய்து கொள்வோமே!

பொருட்கள்

பயிற்றங்காய் - ¼ கிலோ
பலாக்கொட்டை – 10
சின்ன வெங்காயம் - 5-6
பச்சை மிளகாய் - 1
வெந்தயம் - ½ ரீ ஸ்பூன்
மிளகாய்த் தூள் - 1 ரீ ஸ்பூன்
தனியா தூள் - ½ ரீ ஸ்பூன்
சீரகத் தூள் - ½ ரீ ஸ்பூன்
தேங்காய்ப்பால் - 1 ½ ரீ கப்
தேசிப் புளி – 1 ரீ ஸ்பூன்
உப்பு – தேவையான அளவு

தாளிக்க

ஓயில் - 2 ரீ ஸ்பூன்
கடுகு – ½ ரீ ஸ்பூன்
உழுத்தம் பருப்பு- ½ ரீ ஸ்பூன்
சாம்பார் வெங்காயம் - 4-5
கறிவேற்பிலை – சிறிதளவு

செய்முறை

காயை இரண்டு அங்குல நீள் துண்டங்களாக முறித்து எடுங்கள்.


பலாக்கொட்டையின் மேல் தோலை நீக்கிவிடுங்கள். உட் தோலை விரும்பாதுவிட்டால் தண்ணீரில் 5 நிமிடங்கள் போட்டு தோலைச் சுரண்டி எடுத்துவிடுங்கள். ஆனால் அதில் அதிக ஊட்டச் சத்து உள்ளதை மறந்து விடாதீர்கள்.

பாலாக்கொட்டையை பாதியாக நீளவாட்டில் வெட்டி வையுங்கள்.

வெங்காயம் சிறியதாக வெட்டிக் கொள்ளுங்கள்.

பச்சை மிளகாயை இரண்டு துண்டுகளாக வெட்டி விடுங்கள்.

தாச்சியில் காய், பலாக்கொட்டை, வெட்டிய வெங்காயம் மிளகாய் இவற்றுடன் வெந்தயம், உப்பு, தூள் வகைகள் சேர்த்து, தேங்காய்ப்பாலை ஊற்றி கலக்கி இறுக்கமான மூடி போட்டு அவியவிடுங்கள்.

பத்து நிமிடங்களின் பின் திறந்து தட்டைக் கரண்டியால் பிரட்டிவிட்டு, தீயை சற்றுக் குறைத்து வையுங்கள்.

இரண்டு நிமிடங்களின் பின் மூடியைத் திறந்து பிரட்டிவிடுங்கள்.

தீயை நன்றாகக் குறைத்து வைத்து காய் நன்கு வரண்டு வர தீயை அணைத்து
எலுமிச்சம் சாறு விட்டு பிரட்டி இறக்குங்கள்.

ஓயிலில் தாளிக்கும் பொருட்களைத் தாளித்து, சமைத்த காய்களைக் கொட்டி ஒரு தடவை பிரட்டி இறக்கிவிடுங்கள்.

சேவிங் போலில் எடுத்து வையுங்கள்.

கமகம மணத்துடன் பயிற்றங்காய் பிரட்டல் தயார்.

மாதேவி

சுவீற் அன்ட் சவர் டால்

பருப்பு வகைளிலே பாசிப்பருப்பிற்கு தனி ஒரு இடம் உண்டு. முழுப் பாசிப் பருப்பாகவும் உடைத்த பாசிப் பருப்பாகவும் பயன்படுத்திக் கொள்கிறோம்.

பச்சையாகவும், வறுத்தெடுத்தும் சமையல் செய்யலாம். வறுத்தெடுத்த பருப்பு நல்ல மணத்தையும் சுவையையும் கொடுக்கும்.

பாசிப்பருப்பில் குழம்பு, சுண்டல், இனிப்புத் துவையல், பொரியல், சட்னி, சாம்பார், கூட்டு, போன்ற கறிவகைகளைச் செய்யலாம்.


அடை, கொழுக்கட்டை, மோதகம், பிட்டு, வடை, தோசை போன்ற சிற்றுண்டி உணவு வகைகளும் செய்து கொள்ளலாம்.

இன்றைய சமையல் வறுத்து உடைத்;தெடுத்து தோல் நீக்கிய பாசிப்பருப்பில், மாங்காய் சேர்த்து சுவைக்கு வெல்லங் கலந்து சுவீற் அன்ட் சவர் டாலாக செய்தது.

காரச் சுவைக்கு சிறிது மிளகாய்ப் பொடி சேர்த்து ரொட்டி , தோசை, சாதம். பிரியாணி, சப்பாத்தி, நாண், என எதற்கும் ஏற்றது. சைட் டிஸ்சாக இருக்கும்.

தேவையான பொருட்கள்

1. பாசிப்பருப்பு வறுத்து உடைத்தெடுத்தது – ½ கப்
2. மாங்காய் - 1
3. மிளகாய்ப் பொடி - 1 ரீ ஸ்பூன்
4. மஞ்சள் பொடி - ¼ ரீ ஸ்பூன்
5. கறுவாப் பொடி – சிறிதளவு
6. உப்பு தேவைக்கு ஏற்ப
7. வெல்லம் - 2 கட்டி

தாளிக்க

ஓயில் - 1 டேபிள் ஸ்பூன்
வெங்காயம் - 1
பூண்டு – 3
செத்தல் - 2
கடுகு சிறிதளவு
உழுத்தம் பருப்பு சிறிதளவு
கறிவேற்பிலை சிறிதளவு

செய்முறை

முற்றிய புளிப்பான மாங்காயை தோலுடன் நடுத்தரத் துண்டுகளாக வெட்டி வையுங்கள்.

வெங்காயம் பூண்டு செத்தல் சிறியதாக வெட்டி எடுங்கள்.

பருப்பை 2 ½ கப் நீரில் அவிய வைத்து, வெந்ததும் மாங்காய்த் துண்டங்களைப் போட்டு அவிய விடுங்கள்.


பின்பு மிளகாய்ப் பொடி, மஞ்சள் பொடி, கறுவாப் பொடி, தேவைக்கு ஏற்ப உப்பு கலந்து கிளறி ஒரு கொதிவிட்டு, வெல்லம் சேர்த்து இறக்குங்கள்.

ஓயிலில் செத்தல், கடுகு, உழுத்தம் பருப்பு தாளித்து, பூண்டு, வெங்காயம் சேர்த்து வதக்கி இறுதியில் கறிவேற்பிலை சேர்த்து பருப்பில் கொட்டிக் கிளறி விடுங்கள்.

வறுத்த பருப்பும் தாளித வாசமும் கமகமக்க சுவை தரும்.

மாதேவி.

கத்தரி கடலைக் குழம்பு

கத்தரிக்காய் (brinjal) என்றாலே எண்ணெயில் பொரிய வைத்து எடுத்து, கடுகு பூண்டு, வெங்காயம், வெந்தயம், கறிவேற்பிலை தாளித்துக் கொட்ட ஊரெல்லாம் மணம் கூட்டும்.

பின் அதற்கு உப்பிட்டு மிளகாய்ப் பொடி சேர்த்து, புளிக் கரைசல், கெட்டித் தேங்காய்ப் பால் விட்டு அடுப்பில் ஏற்ற கமகமக்கும்.

இப்பொழுது சாப்பிட வாருங்கள் என வீட்டில் உள்ளோரை அழைக்கத் தேவையில்லை.

சமையலறையை தாமாகவே எட்டிப் பார்ப்பார்கள்.

வாய்க்கு ருசியான கத்தரிக்காய் காரக் குழம்பு அனைவரையும் மயக்குவதில் வல்லது.

எண்ணெயில் பொரித்து எடுத்த உணவுகள் நாக்கிற்கு சுவை கொடுக்கும் எனச் சொல்லத் தேவையில்லை.

எண்ணெயில் பொரித்து எடுக்கும் போது அதிலுள்ள சத்துக்கள் அழிய வாய்ப்புண்டு. உடல் நலத்திற்கு நன்மை தரும் என்று கூற முடியாது.

எனவே இத்துடன் அவித்த கடலையைக் கலந்து கொண்டால் கத்தரிக்காய் குழம்பும் வித்தியாசமாக இருக்கும். கடலையின் புரதச் சத்தும் போனஸாகக் கிடைக்கும்.

ஒரு முறை செய்துதான் பாருங்களேன்.

முயற்சிக்கு தேவையானவை

கத்தரிக்காய் - 4
கடலை – ¼ கிலோ
தக்காளி - 2
வெங்காயம் - 1
பச்சை மிளகாய் - 1
பூண்டு – 4
இஞ்சி – 1 துண்டு
தேங்காய்த் துருவல் - 2 டேபிள் ஸ்பூன்
மிளகாய்ப் பொடி – 1 ரீ ஸ்பூன்
தனியா பொடி - ¼ ரீ ஸ்பூன்
மஞ்சள் பொடி - ¼ ரீ ஸ்பூன்
உப்பு – விருப்பத்திற்கு ஏற்ப
புளிக் கரைசல் – விருப்பத்திற்கு ஏற்ப
பொரிக்க எண்ணெய் - ¼ லீட்டர்
கடுகு
கறிவேற்பிலை
ரம்பை

வறுத்து அரைத்து எடுக்க

பட்டை – 1
கராம்பு – 2
ஏலம் - 2

கடலையை அவித்து எடுத்து வையுங்கள்.

பூண்டு, இஞ்சி, தேங்காய்த் துருவல் அரைத்து எடுங்கள்.

வெங்காயம் மிளகாயை சிறியதாக வெட்டுங்கள்.

கத்தரிக்காயை இரண்டு அங்குல நீள மெல்லிய துண்டுகளாக தண்ணீரில் வெட்டி வையுங்கள்.

தக்காளியை நடுத்தரத் துண்டங்களாக வெட்டி வையுங்கள்.

எண்ணெயைக் கொதிக்க வைத்து பிழிந்து எடுத்த கத்தரிக்காய்த் துண்டுகளை பொன்னிறத்தில் பொரித்து எடுங்கள்.

இரண்டு டேபிள் ஸ்பூன் ஓயிலில் கடுகு, வெங்காயம், பச்சை மிளகாய், கறிவேற்பிலை, ரம்பை தாளித்து, தக்காளி சேர்த்து பூண்டு, இஞ்சி, தேங்காய்த் துருவல் அரைத்த விழுது சேர்த்து பச்சை வாசம் போக நன்றாகக் கிளறி புளிக் கரைசல் விட்டு, அரைக் கப் தண்ணீர் விட்டு உப்பு, மிளகாய்ப் பொடி, தனியா பொடி, மஞ்சள் பொடி, அரைத்த மசாலாப் பொடி சேர்த்து கொதிக்க விடவும்.

கொதித்த பின் கடலை, பொரித்த கத்தரிக்காய் சேர்த்து இரண்டு கொதி விட்டு இறக்குங்கள்.

சாதம், பிரியாணி, சப்பாத்தி, இடியாப்பம், பிட்டு, ரொட்டி, அப்பம் என எதற்கும் ஏற்ற சைட் டிஸ்சாக உதவும்.

மாறுதலுக்கு -

புளிக் கரைசலுக்கு பதிலாக சமைத்த பின் எலுமிச்சம் சாறு சேர்த்துக் கொள்ளலாம். வித்தியாசமான சுவையைக் கொடுக்கும். தக்காளி சேர்ப்பதால் புளியை சற்று குறைத்து விட்டுக் கொள்ளுங்கள்.

கத்தரி பற்றிய விபரங்களுக்கு:-
http://www.thefreedictionary.com/brinjal

மாதேவி

பொட்டுக்குள்ளால் எட்டிப் பார்க்கும்

கத்தரி
வெள்ளையாக
மாறுமா?
மாறும்!
வெள்ளையாக மட்டுமென்ன
செம்மையாக, மஞ்சளாக .. இன்னும் இன்னும்

கத்தரி வாழையுடன் கூட்டிணைந்து
தேங்காய்ப் பாலில் முக்குளித்து,
தேசியுடன் கலக்கும் போது
வாசனை கமழும், வாயூறும்

அக்கம் பக்கமும்
பொட்டுக்குள்ளால்
எட்டிப் பாரக்கும்.

ஊர்க் கத்தரியானால்
ஊரே கூடும்.

சுவைப்போமா?

தேங்காய்ப் பால் கத்தரி

தேவையான பொருட்கள்

1. பிஞ்சுக் கத்தரிக்காய் - 2
2. வாழைக்காய் - 1
3. சின்ன வெங்காயம் - 5,6
4. பச்சை மிளகாய் - 2
5. வெந்தயம் - ½ ரீ ஸ்பூன்
6. தேங்காய்த் துருவல் - ½ கப்
7. மஞ்சள் தூள் விரும்பினால்
8. தேசிப்பழம் - ½
9. கறிவேற்பிலை – 1 இலை
10. உப்பு தேவையான அளவு

தாளிக்க

1. சின்ன வெங்காயம் - 3,4
2. தாளிதக் கலவை - 1 ரீ ஸ்பூன் (கடுகு, உழுத்தம் பருப்பு, சீரகம், சோம்பு,)
3. கறிவேற்பிலை – 1 இலை
4. எண்ணெய் - 1 டேபிள் ஸ்பூன்

செய்முறை

1 ம் கெட்டிப் பாலை எடுத்து தனியே வைத்துவிடுங்கள். 2ம், 3ம் பாலை ஒரு கோப்பையில் விட்டுக் கொள்ளுங்கள்.

கத்தரிக்காயை முழுதாகக் கழுவி எடுத்து தண்ணீரில் சின்னவிரலளவு நீள் துண்டுகளாக வெட்டிக் கொள்ளுங்கள்.

வாழைக்காயின் தோலை உட் தோலுடன் சீவிக் கழிக்கவும், காயை தண்ணீரில் கத்தரியைப் போல வெட்டிக் கொள்ளுங்கள்.

வெங்காயம் மிளகாயை தனித்தனியே நீளமாக வெட்டிக் வையுங்கள்.
அடுப்பில் வைக்கும் பாத்திரத்தை எடுத்து 2ம், 3ம் பாலை ஊற்றி வைத்துக் கொள்ளுங்கள்.

காய்கறிகளை 2-3 தண்ணீரில் கழுவிக் கொண்டு பாத்திரத்தில் போடுங்கள். பச்சை மிளகாய், வெங்காயம், உப்பு, மஞ்சள், வெந்தயம் சேர்த்து இறுக்கமான மூடி போட்டு 5-7 நிமிடம் அவிய விடுங்கள்.

திறந்து பிரட்டிவிடுங்கள். மீண்டும் மூடி போட்டு 2 நிமிடம் அவியவிட்டு எடுத்து கிளறி, தண்ணிப்பால் வற்ற, 1ம் பாலை ஊற்றி 1 நிமிடம் கொதிக்கவிட்டு இறக்கி, எலுமிச்சம் சாறு சேர்த்துவிடுங்கள்.

எண்ணெயில் தாளித்துக் கொட்டி கிளறிவிடுங்கள்.
தேங்காய்ப்பால் மணத்துடன் குழந்தைகளும் விரும்பி உண்ணும் கறியாகிவிடும்.

குறிப்பு

வாழைக்காய்க்குப் பதில் உருளைக்கிழங்கு, பலாக்கொட்டை கலந்து கொள்ளலாம்.

அசைவம் உண்போர் கருவாடு சேர்த்துக் கொண்டால் சுவை தரும்.

-: மாதேவி :-

உருளைக்கிழங்கு வெங்காய வறுவல்

முதல்முதல் சமையல் செய்யப் பழகுவோருக்கும், Bachelors க்கும் உகந்தது.

ருசியாகவும் இலகுவாகவும் தயாரிக்கக் கூடியது என்பதால் அவர்கள் விரும்புவார்கள்.

அவசர யுகத்தில் அனைவருக்கும் ஏற்றது.

செத்தல் மிளகாய் வெட்டுத்தூள் சேர்ப்பதால் அழகையும் கொடுக்கும்.

சாதம், பிரியாணி, புட்டு, சப்பாத்தி, அப்பம், தோசைக்கு தொட்டுக் கொள்ளலாம்.

தேவையான பொருட்கள்.

1. உருளைக்கிழங்கு – 4
2. வெங்காயம் - 2 (நீளவாட்டில் வெட்டியது)
3. செத்தல் வெட்டுத்தூள் - 2 ரீ ஸ்பூன் (செத்தல் 4-5 யை இடித்தும் எடுக்கலாம்)
4. இஞ்சி பேஸ்ட் - 1 ரீ ஸ்பூன்
5. கடுகு – ¼ ரீ ஸ்பூன்
6. பட்டை(கறுவா) – 1 துண்டு
7. கறிவேற்பிலை சிறிதளவு
8. உப்பு தேவையான அளவு
9. எண்ணெய் - 2 டேபிள் ஸ்பூன்

விரும்பினால்

1. ரம்பை – 2 துண்டு
2. சேர – 2 துண்டு
3. மல்லித்தழை சிறிதளவு
4. எலும்மிச்சைச் சாறு – 1 ரீ ஸ்பூன்
5. பெருங்காயப் பொடி சிறிதளவு


செய்முறை

1. கிழங்கை அவித்து எடுத்து பெரிய துண்டங்களாக வெட்டி வைக்கவும்.
2. எண்ணெயில் கடுகு பட்டை தாளித்து இஞ்சி பேஸ்ட் வதங்க (விரும்பினால் பெருங்காயப் பொடி சேர்க்கவும்) வெங்காயம் சேர்த்து மெல்லிய பிரவும் நிறம் வரும்வரை வதக்கவும்.
3. வதங்க வெட்டுத்தூள் சேர்த்து பச்சை வாசம்போக கிளறி கறிவேற்பிலை போட்டு வதக்கவும். (விரும்பினால் ரம்பை, சேர, சேர்க்கவும்)
4. கிழங்கைக் கொட்டி உப்புப் போட்டு 2 நிமிடம் கிளறி எடுக்கவும்.
5. விரும்பினால் எலும்மிச்சைச் சாறு விட்டு மல்லித்தழை தூவவும்.

-: மாதேவி :-

வெள்ளிக்கிழமை ஸ்பெசல்

வெள்ளிக் கிழமை நாட்களில் அதிகாலையிலேயே வீடுகளில் பரபரப்பு. பாத்ரூம்களில் ஓடும் நீரால் தண்ணி பில் அன்றே இரட்டையாகும். பலர் வீடுகளில் விரதம். விரதம் இல்லாவிட்டாலும் சைவம். வீடு மொப் செய்தல், உடுப்பு அலசல் எனப் புனிதப்படுத்தும் வீட்டு வேலைகள் நாரியை முறிக்கும்.

கோவிலில் வருகை பதியும் பணியும் காத்திருக்கும்.

திரும்பும் வழியில் வெள்ளவத்தை காலி வீதி முழுவதும் பலரது கைகளிலும் தொங்கும் பைகளில் மரக்கறிகளும் பழங்களும் நிறைந்து வழியும்.

பாக்கிற்குள் இருந்து ஒருவர் எட்டிப் பாரப்பார். ஒல்லியாக நீட்டம் நீட்மாக, பச்சைக் கலரில்!

அன்று அவருக்கு சந்தையில் டிமான்ட அதிகம். சந்தை வியாபாரி கூசாமல் விலையை 10, 20 கூட்டிச் சொல்வான்.

மஹியங்கனவில் இருந்து வந்தாலும் யாழ்ப்பாண முருங்கா! மலிவு மலிவு எனக் கூவுவார்கள்.

மதியமானால் காக்காக் கூட்டங்களின் பாட்டும் கூடிவரும். மாமிசப் பிரியர்களும் இவர் இருந்தால் சமாளித்துவிடுவார்கள். வெள்ளிக்கிழ்மைக்கு எல்லாரும், எல்லாமும் இசைவாக்கம் ஆகிவிடுகின்றனவா?

பொதுவாகவே முருங்கைக் காயை பலரும் குழம்பாகவே செய்து கொள்வர். இது சற்று வித்தியாசமான பிரட்டல் கறிவகை. வாய்கு மிகவும் ருசியானது.

முருக்கைக்காய்ப் பிரட்டல்

தேவையான பொருட்கள்

1. முருங்கைக் காய் - 2
2. உருளைக் கிழங்கு பெரியது - 1
3. பெரிய வெங்காயம் - 1
4. தக்காளி -4
5. பச்சை மிளகாய் - 1
6. பூண்டு – 2
7. வெந்தயம் - 1 ரீ ஸ்பூன்
8. தேங்காய்த் துருவல் - 1 கப்
9. மிளகாய்ப்பொடி – 1 ரீ ஸ்பூன்
10. தனியாப்பொடி – 1/2 ரீ ஸ்பூன்
11. சீரகப்பொடி - 1/2 ரீ ஸ்பூன்
12. மஞ்சள்பொடி சிறிதளவு
13. உப்பு தேவைக்கு ஏற்ப

தாளித்துக்கொள்ள

1. கடுகு சிறிதளவு

2. உழுத்தம் பருப்பு - 1/2ரீ ஸ்பூன்
3. ரம்பை ஒரு துண்டு
4. கறிவேற்பிலை சிறிதளவு
5. தாளிக்க எண்ணெய் - 2 ரேபில் ஸ்பூன்

செய்முறை

முருங்கைக்காயை சின்ன விரலளவு துண்டங்களாக வெட்டி எடுங்கள். கிழங்கையும் தக்காளியையும் தனித்தனியே துண்டங்களாக வெட்டி வையுங்கள். வெங்காயத்தை சிறியதாக வெட்டுங்கள். மிளகாயை நீளவாட்டில் 2 துண்டுகளாக்கிக் கொள்ளுங்கள். உள்ளியை பேஸ்ட் செய்து வைத்துக் கொள்ளுங்கள். தேங்காய்த் துருவலிலிருந்து 2 கப் பால் தயாரித்துக் கொளளுங்கள்.

பாத்திரத்தை அடுப்பில் வைத்து எண்ணெயை விட்டு கடுகு உழுத்தம் பருப்புப் போட்டு, உள்ளிப் பேஸ்ட் சேர்த்து ஒரு நிமிடம் கிளறி வெங்காயம் சேர்த்து வதக்கிக் கொள்ளுங்கள். பின்பு வெந்தயம் ரம்பை கருவேற்பிலை போட்டு முருங்கைக்காய்களைக் கொட்டி 2 நிமிடங்கள் வதக்குங்கள். சற்றுப் பச்சை வாசம் போக பாலூற்றி கிழங்கு சேர்த்து 9-13 வரையான பொருட்களைச் சேர்த்துக் கிளறி, இறுக்கமான மூடி போட்டு அவிய விடுங்கள்.

5 நிமிடத்தின் பின் திறந்து பிரட்டி விடுங்கள். மீண்டும் மூடி போட்டு 2 நிமிடம் அவிய விடுங்கள்.

2 நிமிடத்தின் பின் திறந்து தக்காளி சேர்த்து திரும்பவும் மூடி, அடுப்பைக் குறைத்து 5 நிமிடம் விடுங்கள்.

இப்பொழுது திறந்தால் இறுக்கமாக வந்திருக்கும். அடியில் சற்று குழம்பு இருந்தால் திறந்தபடி விட்டுப் பிரட்டி, குழம்பு நன்றாக வற்றி வரள இறக்குங்கள்.

முருங்கைக் காய்களின் மேற் தோலும் மென்மையாக வந்து விடும். மணமும் ஊரைக் கூட்டும்.

காரக் கூட்டு முருக்கைக்காய்

தேவையான பொருட்கள்

1. முருங்கைக்காய் - 3 சற்று சதைப்பிடியான காயாக இருக்க வேண்டும்.
2. வாழைக்காய் -1
3. சின்ன வெங்காயம் -10
4. பச்சை மிளகாய் -1
5. தேங்காய்த் துருவல் - 4 டேபிள் ஸ்பூன்
6. செத்தல் மிளகாய் - 5,6
7. மிளகு – ½ ரீ ஸ்பூன்
8. சீரகம் - ½ ரீ ஸ்பூன்
9. மஞ்சள் சிறிதளவு
10. பூண்டு – 4
11. புளி – ஒரு சிறிய எலுமிச்சையளவு
12. உப்பு தேவையான அளவு

தாளித்துக்கொள்ள

1. கடுகு – சிறிதளவு

2. கருவேற்பிலை – சிறிதளவு
3. எண்ணெய் - 1 ரீ ஸ்பூன்

செய்முறை

முருங்கைக்காயை விரலளவு துண்டங்களாகவும், வாழைக்காயை நீளத் துண்டுகளாகவும் வெட்டிக் கொள்ளுங்கள். வெங்காயங்களை இரண்டு மூன்றாக வெட்டிக் கொள்ளுங்கள். பச்சை மிளகாயை இரண்டாகக் கீறிவிடுங்கள்.

தேங்காயைத் தனித்தும், செத்தல் மிளகாய், மிளகு, சீரகம், மஞ்சள், பூண்டு ஆகியவற்றைப் பிறிதாகவும் அரைத்து எடுங்கள்.

பாத்திரத்தில் இரண்டு கப் தண்ணி விட்டு முருங்கைக்காயையும் வாழைக்காயையும் உப்பு சேர்த்து, மூடி போட்டு அவிய விடுங்கள். முக்கால் பாகம் வெந்ததும், மிளகாய்க் கூட்டுப் போட்டு, பச்சை மிளகாய், வெங்காயம் சேர்த்து கிளறி மூடிவிடுங்கள். இரண்டு நிமிடம் ஆனதும் திறந்து, தேங்காய்க் கூட்டுப் போட்டு கிளறி புளி கரைத்து ஊத்திவிடுங்கள்.

தடிப்பாக வர இறக்கி எடுத்து வையுங்கள். பின்பு தாளித்துக் கலந்து கொள்ளுங்கள்.

காரக் கூட்டு மணத்துடன் கறி தயார்.

:-மாதேவி-:

இடியப்பம் + அதற்கான வெஜி டிஸ்களும்

காலைத் தூக்கம் பற்றி சொல்லவே தேவையில்லை. இதமான மெல்லிய குளிர் காற்று உடலை வருடிக் கொண்டிருக்க ஆழ்ந்து உறங்குவதிலுள்ள சுகம் எழுத்தில் சொல்லி மாளாது.

அவ் உறக்கத்தின் ஊடே அம்மாவி்ன் அம்மாவின் கைமணமும் சேர்ந்து வருமே அடுக்களையிலிருந்து. முட்டைப் பொரியலின் மணமும் அதனுடன் கூடிய பாற்சொதியின் வாசமும் சேர்ந்து மூக்கைத் துளைக்க தூக்கம் தானே பறக்கும். வயிறு எழ ஆரம்பிக்கும்.

'இன்று என்ன சாப்பாடு என்ற எண்ணமும் பிறக்குமே'. அதற்குள் மிளகாய் வறுத்த கார வாசமும் எழ புரிந்துவிடும்.

ஐ . . . இடியாப்பம்.
உரலின் ஓசை உறுதிப்படுத்தும்.

அடி சக்கை இடிசம்பலும் கிடைக்கும்போல!

இடியப்பத்திற்குள் நாமும் செல்வோமா?

இடியப்பம்
தேவையான பொருட்கள்

வறுத்த அரிசிமா -2 கப்
அவித்த மைதாமா - 1/4 கப்
உப்பு சிறிதளவு
கொதிநீர்

செய்முறை

ஒரு பாத்திரத்தில் மாவைப் போட்டு உப்பு சேர்த்து கலந்து வைத்துக் கொள்ளுங்கள். தண்ணீரை நன்கு கொதிக்க வைத்து ஆவி பறக்கும் சூட்டில் எடுத்து சிறிது சிறிதாக ஊற்றி மரக்கரண்டிக் காம்பால் கிளறி இறுக்கமான மாவு தயாரித்து எடுக்கவும்.

இட்லிப் பாத்திரம் அல்லது ரைஸ் குக்கரில் நீர் விட்டு, ஸ்ரிம் தட்டு போட்டு பாத்திரத்தை மூடி கொதிக்க வையுங்கள். இடியப்ப உரலை எடுத்து மாவை வைத்து தட்டுக்களில் பிழிந்து வையுங்கள். அழகாக வட்டம் போல சுற்றுங்கள். இரண்டு தடவை மட்டும் சுற்றினால் சிறிதாக, பார்வைக்கும் உண்பதற்கும் இதமான அளவில் இடியப்பம் இருக்கும்.

தண்ணீர் கொதித்ததும் பிழிந்த இடியப்பங்களை அவித்து எடுங்கள். 5-7 நிமிடங்கள் வரை அவியவிட்டால் பதமாக இருக்கும்.

ஐ! இடியப்பம் தயார். சாப்பிடக் கூப்பிடுங்க.

குறிப்பு :- வெள்ளை அரிசி மாவாக இருந்தால் கண்ணுக்கு அழகாக இருக்கும். ஆனால் சிவத்த மாவில் செய்தால் தவிட்டுச் சத்தும் சேர்வதால் ஆரோக்கியத்திற்கு நல்லது.
அவித்த மைதா மாவிலும் செய்து கொள்ளலாம். கொதிநீரை சற்று ஆறவிட்டு மாவைக் குழைத்தால்தான் இடியப்பம் பதமாக வரும்.

மிக்ஸ்ட் வெஜிற்றபில் சொதி

தேவையான பொருட்கள்

முருங்கைக் காய் - 5,6 துண்டுகள்
கரட் - சின்னது - 1
உருளைக்கிழங்கு - 1
போஞ்சி - 5,6
தக்காளிப்பழம் - 2
சின்ன வெங்காயம் - 6,7 அல்லது பெரிய வெங்காயம் பாதி
பச்சை மிளகாய் - 4
தேங்காய்த் துருவல் - 2 கப்
வெந்தயம் - 1/2 தேக்கரண்டி
சோம்பு - 1/4 தேக்கரண்டி
தேசிச்சாறு - 1/2 தேக்கரண்டி
மஞ்சள் பொடி சிறிதளவு (விரும்பினால்)
உப்பு தேவைக்கு ஏற்ப
கறிவேற்பிலை - சிறிதளவு

தாளிக்க விரும்பினால்

கடுகு - 1/4 தேக்கரண்டி
உழுத்தம் பருப்பு - 1/2 தேக்கரண்டி
எண்ணெய் - 2 தேக்கரண்டி

செய்முறை

மரக்கறிகளை சிறிய துண்டங்களாக வெட்டி எடுங்கள். வெங்காயத்தையும் சிறியதாக வெட்டிக் கொள்ளுங்கள். மிளகாயை நீளவாட்டில் பிளந்து விடுங்கள்.

தேங்காயத் துருவலுடன் 1/2 கப் தண்ணீரர் விட்டு மிக்சியில் அடித்து கோப்பையில் வடித்து வையுங்கள். மீண்டும் 1/2 கப் தண்ணீர் விட்டு பால் எடுத்து, முதல் எடுத்த பாலுடன் கலந்து விடுங்கள். திரும்ப ஒரு கப் தண்ணீர் விட்டு பால் எடுத்து பால் கோப்பையில் கலந்துவிடுங்கள்.

அடுப்பில் வைக்கும் பாத்திரத்தில் தக்காளி தவிர்ந்த ஏனைய மரக்கறிகளைப் போட்டு வெங்காயம், பச்சை மிளகாய், வெந்தயம், சோம்பு, கறிவேற்பிலை, உப்பு, ஒரு கப் தண்ணீர் ஊற்றி அவியவிடுங்கள். முக்கால் பாகம் அவிந்ததும் தக்காளியைச் சேர்த்து விடங்கள். இரண்டு நிமிடம் அவிந்ததும் தேங்காயப் பாலை ஊற்றி கலக்கிவிடவும்.

பால் திரளாமல் இருக்க அரை தேக்கரண்டி எலுமிச்சம்சாறு சேர்த்து கொதிக்கிடுங்கள். அடிக்கடி கலக்கிக் கொள்ளுங்கள். கொதித்துவர இறக்கி பரிமாறும் கோப்பையில் ஊற்றிக் கொள்ளுங்கள்.

தாளிக்க விரும்பினால் தாளிதத்தை கலந்து விடுங்கள்.

கமகமக்கும் பால் சொதி தயார்

கிழங்கு தக்காளி குழம்பு

தேவையான பொருட்கள்

தக்காளி - 500 கிராம்
அவித்த உருளைக்கிழங்கு - 4
பெரிய வெங்காயம் -2
பச்சைமிளகாய் - 1
தேங்காய்த் துருவல் - 1 1/2 கப்
மிளகாய்ப் பொடி- 1 தேக்கரண்டி
தனியாபபொடி - 1/2 தேக்கரண்டி
மஞ்சள் சிறிதளவு
உப்பு தேவைக்கு ஏற்ப

தாளிக்கத் தேவையானவை

தேங்காய் எண்ணெய் - 2 மேசைக்கரண்டி
கடுகு - 1/4 தேக்கரண்டி
சோம்பு - 1/4 தேக்கரண்டி
கறுவா 1 துண்டு
உள்ளி பேஸ்ட் சிறிதளவு
ரம்பை 1 துண்டு
கறிவேற்பிலை - சிறிதளவு

செய்முறை

தக்காளி கிழங்கு இரண்டையும் துண்டங்களாக தனித்தனியே வெட்டி வையுங்கள். வெங்காயம் சிறியதாகவும், பச்சை மிளகாயை இரண்டு தண்டங்களாகவும் வெட்டிக் கொள்ளவும்.

தேங்காயத் துருவலுடன் 1/2 கப் தண்ணீரர் விட்டு மிக்சியில் அடித்து கோப்பையில் வடித்து வையுங்கள். மீண்டும் 1/2 கப் தண்ணீர் விட்டு பால் எடுத்து, முதல் எடுத்த பாலுடன் கலந்து விடுங்கள்.
திரும்ப ஒரு கப் தண்ணீர் விட்டு பால் எடுத்து பிறிதொரு கோப்பையில் எடுத்து வையுங்கள்.

எண்ணெயைச் சூடாக்கி தாளிக்கும் பொருட்களை மேலே சொன்ன வரிசையில் தாளியுங்கள். இத்துடன் வெங்காயம் சேர்த்து வதக்கி, பச்சை மிளகாய், தக்காளித் துண்டங்கள் போட்டு ஒரு நிமிடம் கிளறுங்கள். உப்பு, மிளகாய்ப்பொடி, தனியாப்பொடி, மஞ்சள்பொடி சேர்த்து கிழங்கையும் போட்டு தனியே எடுத்து வைத்த பால் விட்டு மூடி போட்டு 5-7 நிமிடங்கள் கொதிக்க விடுங்கள். மூடியைத் திறந்து கெட்டிப்பால் ஊற்றி விடுங்கள்.

கொதித்துவர கிளறி இறக்கி பரிமாறும் கோப்பையில் விட்டுக் கொள்ளுங்கள்.
மிளகாயத்தூள் வாசம் கமழ குழம்பு அழைக்கும்.

சோயா, கிழங்கு, தக்காளி பிரட்டல்

ரைஸ் பிரியாணி, இடியாப்ப பிரியாணி, சாதம், புட்டு, ரொட்டி, சப்பாத்தி போன்ற எதற்கும் ஏற்ற டிஸ்தான் சோயா கிழங்கு தக்காளி பிரட்டல்.

தேவையான பொருட்கள்

சோயா - 1 1/2 கப்
உருளைக் கிழங்கு நடுஅளவாக - 1
தக்காளிப் பழம் - 3
பெரிய வெங்காயம் - 1
பச்சை மிளகாய்- 1
மிளகாயத் தூள் - 1 தேக்கரண்டி
மஞ்சள்தூள்- சிறிதளவு
தனியா(மல்லி) தூள் - 1/2 தேக்கரண்டி
டொமாட்டோ சோஸ் - 2 தேக்கரண்டி
சில்லி சோஸ் - 1தேக்கரண்டி
உப்பு - தேவையான அளவு
கறுவா - 1துண்டு
இஞ்சி - 1 துண்டு(பேஸ்ட்)
சுடுநீர் - 3 கோப்பை

வறுத்துப் பொடியாக்க

கறுவா - 1துண்டு
கராம்பு - 1
ஏலம் - 1
சின்னச்சீரகம் - 1/4 தேக்கரண்டி
தாளிக்க
கடுகு - 1/4 தேக்கரண்டி
இஞ்சி, உள்ளி பேஸ்ட் -சிறிதளவு
ரம்பை - 1 துண்டு
கறிவேப்பிலை - சிறிதளவு
மல்லித்தழை - சிறிதளவு
எண்ணெய் - 4 மேசைக்கரண்டி

செய்முறை

சோயாவை கோப்பை ஒன்றில் இடவும். அதனுடன் கறுவாப்பட்டை ஒரு துண்டு, இஞ்சி பேஸ்ட், உப்பு சிறிதளவு சேர்த்து, மூன்று கோப்பை கொதிநீர் ஊற்றி, மூடி ஊறும் வரை வைக்கவும்.

நீரை வடித்து குளிர்ந்த நீரில் கழுவி பிழிந்து எடுக்கவும்.

கிழங்கு தக்காளி, வெங்காயம் சிறியதாக, தனித்தனியாக வெட்டி வைக்கவும்
மிளகாயை நீளவாக்கில் வெட்டிவிடவும்.

எண்ணெயைச் சூடாக்கி கிழங்கை மெல்லிய பிரவுண் கலரில் பொரித்து எடுத்து வைக்கவும். மீதி எண்ணெயில் கடுகு தாளித்து, இஞ்சி பேஸ்ட் வதக்கி, உள்ளி சேர்த்துக் கிளறி, வெங்காயம் பச்சை மிளகாய் சேர்த்து வதங்க, ரம்பை, கறிவேற்பிலை சேர்த்து விடவும். சோயாவைப் போட்டு இரண்டு நிமிடம் வதக்கவும்.

அதன்பின் தக்காளி சேர்த்து பச்சை வாசம் போகும்வரை கிளறி. பொரித்த கிழங்கு உப்பு, மிளகாயப் பொடி, மஞ்சள் தனியாப் பொடி கலந்து இரண்டு நிமிடம் விடவும்.

மசாலாப் பொடி, டொமாட்டோ சோஸ், சிலிசோஸ், மல்லித்தழை சேர்த்துக் கிளறி எடுக்கவும்.